يامه فى البحر حكاوى

في قاع البحر الاحمر(قصيدة)

في قاع البحر الاحمر
الظلم له حكاية
ححاول قد مقدر
احكيها من البداية
حكاية مصري اسمر
كان راجع للحبايب
اصله من مدة سايب
الاهل والقرايب

راجع من غربة صعبه

لبنت حلوه سمره

ملهاش في الفرح نايب


ودارت العبّارة

كان صوتها عالي كتير

وقلب الشب الاسمر

كان اعلى من الهدير

فوق سطح واقف

عاوز يجري.. يطير

مشيت العبّارة

بدأ يعد الساعات

ويحلم بلي جاي

ويضحك على لفات

كان فوق السطح سارح

بالليل وبالحنين

وازاي مروا السنين

واهو راجع مصر يلاقي

اليّ مستنين

غمض عيونه ثانية

وراح لدنيا تانية

شاف فيها نفسه واقف

لابس ابيض في ابيض

وعروسته ماشية جنبه

والناس على الجنبين

لكن مش فرحانين

شاف امه لابسة اسود

ودموعها فالعينين

شاف والده عليه بيقرب

سأله مستغرب

ليه يابا كده حزين

وفجأة

مشيوا بعيد

وخدوا عروسته معاهم

وسبوه واقف وحيد

صرخ باعلى صوت

لكن محدش رد

قال: ده حلم اكيد

فتح عيونه شاف

منظر غير الي كان

مكان غير المكان

اختفى صوت الهدير

وعِلي صوت السُكات

شاف ناس نايمة بعد

ما تعبت من الاهات

واسماك كبيرة بتنهش

لحم الناس الغريقة

شاف جثت اب حاضن

جثة بنته البريئة

حاول يعوم لكن

الوقت كان تأخر

صرخ الله واكبر


وهي ده الحكاية

وزيها الف حكاية في قاع البحر الاحمر